محەمەد غەریب مەعازی /// تا چنڎە ساڵیٛ چێوەڵی فرەتەرو مەردمی جە پاوەنە مانگاوداری دلیٛشانە باوبیٛ ، وەختیٛو پەرسیٛنی ئی مانگاویٛتە پەی چیٛشی ، واچیٛنیٛ پەی دەم و دوٙی ، ڕاسیچت گەرەک بوٙ نان و خەیار و دوٙ ئاوەختیە فرە وەش بیٛ ، دوٙ و ماسەکەش یاگێوە ، بەردەیش پەی لیٛ گاوگەلی یاگێوە تەر .
شانسو ئەمنی بیٛچارەی ئاساڵە گاوگەل بیٛ ساحیب بیٛ ” بیٛ شوانە بیٛ ” و مەشیا ئەمن هەرچی سوحیٛنیٛ ، جە دماو تەعتیلاتی ئی مانگاویٛمە بەردیٛبیا پەی دەورو بیمارستانو پاوەی کە پەنەش واچیٛنیٛ ” دوسردە ” ، یانەیچما ئینا دلیٛڕاسەو پاوەینە ، پەی ئینەیە مانگاوەکیٛ نەگنوٙ دلیٛ قرم و قاڵو شاری ، مەشیا سوحێ زوو مانگاوەکیٛم بەردیٛبیا پەی لەوەڕنای .
سنع و ساڵیچم ئینا دەورو کەلاسو دوویٛ ڕاهنمایی ، یانی ساڵەو پەنجای ، جادەیچ نیمە ئەسفاڵتەن و مانگاوەیچ سەرو ئا ئەسفاڵتیرە کولو جارێوە مەسڵیٛوە و تەکانەش مەوەریٛ و ئەمنیچ واچیٛنیٛ بابەت خاس ئەڎات خاس هەر ئاروٙ وەختو قینکەردەی نیەن .
سەرو ڕاو ئاماولوای مانگاوەکیٛرە ئیدارەو ژاندارمری قەرارش گیٛرتەن و سەربازێوەیچ هەرچی ڕوٙیٛ هەنیٛ ماچوٙ ئی مانگاویٛ مەشیوٙ یاوا دلیٛ بەرەو مەقەڕو ژاندارمری ، مشیو بڕەمنینەش نەکا بتووڕنوٙ ویٛشەرە و دلیٛ بەرەکەی پیس کەروٙ .ئەی خوڎا ئەم چیٛشکەرو ، ئی چیٛویٛ نیەنیٛ دەسوو ئەمنەنە ، مڎیەی ڕوێوە مانگاوەکیٛ چیٛوێ خراوش وارد و ویٛش گیرنەڎا .
تا چنڎە ڕویٛ گوشم پەنە نەڎا و مانگاوەکیٛ بەریٛنیٛ و خاس لەوەڕییٛ و ئاریٛنیٛشۆ و بیٛدەنگ و دنیا ئەمن و ئەمانە بیٛ و سەرەم وزیٛنیٛرە و وردبیٛنێ ، ڕوێوە مڎیەو دەنگوباسێوە دلیٛ بەرەو سەربازخانەکەینە هەن و هەر تیٛر مەڎیان پەیم ، ئەمنیچ سەرەم وزیٛنیٛرە و کارم هەر بە مانگاوەو ویٛمۆ بیٛ .
سوحنە وەختێ چەنی مانگاوەکیٛ یاویٛنیٛ دلیٛبەرەو ژاندار مری ، یوٙ جە سەربازەکان ماچوٙ هوٙشت بوٙ سەوای بازدیدمان چەنە مەکریو ، هوٙشت مانگاوەکیٛتەو بوٙ و یاوا ئی دلیٛبەرە ئەگەر دەنگ بەر باوەروٙ و بوٙڕنوٙ یامەکەتی بتووڕنوٙ ویٛشەرە ، ویٛت مەزانی !!!
ڕاسەش مانگاوەکیٛ پیٛسەو توتکەو باولوفی چا یاگیٛنە شەرتی بییٛبیٛ گوشیٛش قوتیٛ کەردیٛبیٛنیٛوە و زانیٛ چیٛوێوە هەن و حەساسە بیبیٛ بە مەوقیٛعیەتو ئا مەسیرەیە ، ئیسە سەربازی سفریچ وەرو ئەمن بیەبیٛ بە سەرهەنگ ، تا سوح پەنەش نگابانی و قەروڵ دیٛنیٛ زاتش نەویٛ قسیٛ کەروٙ ، شیرە بیەبیٛ ملو ئەمنەرە .
سوحەنە هەر بەتەرس و لەرزەنە خەوەرم بیەو ، یانەمان وەرانوەرو ژاندار مەرینە بیٛ ، چیڎەسۆ دیانی مەڎیەو بەرەو ژاندارمەری دەنگوباسێوە هەن ، مانگاوەی بیٛچاریٛم بە دڵەلەرزیٛ وستەڕا ، هەرچی دیێنیٛ مانگاویٛرە مەڎیەو حاڵش خاس نیەن و لارە لار مەلوٙڕانە ، جا یانەیچەنە بە قسیٛمان گوش نەدیٛنیٛ ، هەرچی واچیٛنیٛ با ئاروٙ نەبەروش ، گوشم پەنە نەڎیٛنیٛ .
مانگاوەم دەینەوەرو خەریکەنان چەنی ویٛم قسیٛ مەکەروو ، ئەی خوڎا هەر نەیاوو دلیٛ بەرەو ئایاگیٛ ، سەرەم هوٙربڕنا خەریکیٛنمیٛ نزیکیٛ مەگنمیٛوە ، مەڎیەو کولو دەرجە دارەکان ئامەینیٛ بەرو جادەی و ئاوپاشی و تەمیزش مەکەران ، یوٙشان ئامە دەممەوە ماچوٙ ئەگەر مانگاوەکیٛت چیٛنە سەوروٙ کەروٙ مەشیوٙ ویٛت بە دەس جەمش بکەری و بلیٛسیشەو ، مانگاوە یاوا دلیٛبەرەو ئەمنیچ زاروٙنانیٛ و توڵێوە عالەم پەنەبیٛ داوەنەو مانگاویٛو دڵم تەکان و شوٙکانشەن ، کەوتانیٛ ڕا مانگاوە هەرقاڵەکەش دی و سەربازیٛ توچیٛبیٛنیٛ وەرو ڕایشان گرتیٛ بیٛ ، مەڎیەو دەورو ویٛشەرە مەخولیۆوە و مەبوٙڕنوٙ و مەتووڕنوٙ ، گوٙشش بە بازدیدی نەڎا دنیاش پیسە کەردە .
ئەمن ئی وەزعیەتەمە دیی تا تاوام سەرەو چیٛر دلیٛ باخەکارە بەرشیانی و مانگاویٛچ دنیاش هوٙرناوێ بیٛ خاس خاسێ کوشتیٛبیٛشان ، مەراسمکەش شیٛونابیٛ پیٛوەرە ، ئا ماجرای بی باعیسو ئینەیە کەیانەنە دەسێو خاس کوشیانی و ئاخرو ماجرای بە ورەشیای مانگاویٛ خاتمەش پەنەئاما ، ڕاسەش ئتر زاتم نەویٛ پا یاگیٛرە رەڎ بونە .
منبع : پاوه پرس
ثبت دیدگاه