هۆرگێڵنای جه فارسی به هه‌ورامی : عبدۆڵڵا حه‌بیبی
ماچا " شا عه‌باس " شه‌وانه‌ی له‌مه‌ش مدرێ گیر ، ڤه‌روو ئانه‌یه مشیه‌یا ئننه لوه‌یا ڕانه تا کۆچێو له‌مه‌کێش سه‌ره‌وه‌یا .
هه‌ر ڤه‌روو ئانه‌یه ئێتر بیه‌بێ کاره‌یو که گرذ شه‌وێوه زیێره و ده‌س که‌رێ گێڵای دلێ شاریه‌نه . وه‌ختێو گرذ که‌س وه‌رمش گنێ پۆره ئاذ چنی وه‌زیره‌که‌یش جلێ شڕێ که‌رێنێنه و پێوه جه کاخه‌نه زیێنێره و لوێنێ دلی شاریه‌نه و ده‌س که‌رێنێ گێڵای . یۆ چا شه‌وا پاڵوو حه‌مامێوی وێرانی قه‌ذیمیه‌نه ره‌ذێ بێنێ که دیشا ده‌نگه ده‌نگێو مه‌ی . شا عه‌باس چنی وه‌زیره‌که‌یش واتش دا با بلمێ چوه‌ر بزانمێ کێنێ چا و چێش ماچا ، پاسه هه‌م کۆچێو جه وه‌خته‌که‌یما ویه‌رۆ و هه‌م مزانمێچ که خه‌ڵک چێش ڤیه‌رۆ دڵشه‌نه.
وه‌زیره‌که واتش به‌ڵێ قۆربان و لوه‌ینه دڵێ وێرانه‌که‌ی . دیشا یه‌رێ نه‌فه‌رێ ئینه چاگه و ئه‌یرشا که‌رذه‌نه‌وه و ده‌سێشا داره‌ینێ ئه‌یره‌که‌یره و ده‌ورشه‌نه نیشتێنێره . شا عه‌باس و وه‌زیره‌که‌ش سڵامشا که‌رذوو ئاذێچێ سڵامه‌که‌شا ئه‌ساوه و یاگێوه‌شا په‌ی ها‌ڵیێ که‌رذێ تا به‌یا وه‌ره‌وه و ده‌وروو ئه‌یره‌که‌ینه بنیشاره. شا عه‌باس وه‌شی تشیش که‌رذ چنیشا و ماچۆ ده‌ی فه‌رماودێ خه‌ریکێ چێشی بێندێ ، ئێمه به‌ره‌وه بێنمێ ده‌نگه‌ده‌نگتا ئه‌ی ، با نه‌ذابۆما دلێ قسه‌کاتا. یۆشا که جه گرذی پیرته‌ر بێ ئاماوه جواب و ماچۆ خێر به‌یدێ سه‌روو چه‌ما، وه‌ڵڵا براکه‌م خه‌ریکێ بێنمێ گرذ که‌س ئاواتێ وێش واچێ . شا عه‌باسیچ ماچۆ ده‌ی ئاواته‌کاتا واچدێ با ئیمه‌یچ بژنه‌ومێشا . کابراچ ئاماوه جواب و ماچۆ وه‌ڵڵا من خه‌ریک بێنێ واچه‌ی واچێنێ که حه‌ز که‌روو ئه‌سپێوم بۆ و تۆره‌کڵێو زه‌ڕ و چی ده‌گانه بزیه‌وڤه ، بلوو پیلا و په‌ولانه و خاس گێڵوو و چێوێ فێر بوو . هه‌ر جه زوه‌وه من ئینه ئاواتما به‌ڵام به داخه‌وه نه ئه‌سپم هه‌ن و نه زه‌ر .
گرذ ده‌سشا که‌رذ خوه‌ی و یۆته‌رشا که یۆ چاخێو بێ ده‌سێوش ئارذ سه‌روو له‌مێشه‌ره و ماچۆ ده‌ی تۆخوا ئانه ئاواتا ئاذی هه‌نش ؟ من ئه‌سپم گه‌ره‌ک نیا به‌ڵام زه‌ڕه‌که‌م گه‌ره‌کا ئه‌ڵبه‌ت نه‌ک تۆره‌کڵێو ، یه‌رێ چوار تۆره‌کڵێ ، با گرذ روێو قازانێوه حه‌لیم بسانوو و بنیشوه‌ره گرذی بوه‌روو !
یه‌رۆمینشا که کۆڕێوی جوان بێ کۆچێو مدراره و مینگێوش که‌رذ و سوور بیه‌وه و چه‌رمه بیه‌وه و هیچش نه‌وات. واتشا ده‌ی واچه بزامێ قسۆ دڵوو تۆ چێشه‌نه ؟ ماچۆ: وه‌ڵڵا من نه پیا‌و گێڵه‌یه‌نا و نه پیا‌و له‌مێ ! ته‌نیا ئاواتم ئانه‌نه ژه‌نه‌کۆ شا عه‌باسی ژنۆ من بیه‌یا ئێتر هیچم جه خوذای گه‌رک نه‌بێ !. تا جوانه‌که‌ی ئی قسێشه که‌رذه، وه‌زیره‌که دیا په‌ی شا عه‌باسی ، به‌ڵام شا عه‌باس وێش لێڵش نه‌که‌رذ و ده‌سشا که‌رذ خوه‌ی و قسێ وه‌شێ که‌رذه‌ی تا نزیکی ساحبی. شۆنیه‌ره گرذ که‌س لواوه په‌ی یانه‌و وێش و شا عه‌باس و وه‌زیریچ لوه‌یوه په‌ی کاخێ .
سه‌به‌یش، شا عه‌باس به وه‌زیره‌که‌یش واتش به نام و نیشان کیانه با ئا یه‌ره نه‌فه‌ره‌یه بارا په‌ی ئێگه‌ی . سه‌روازێ لوه‌ی و گێڵه‌ی تا یۆسێشاوه و ئارذێشا . واتش ئه‌وه‌ڵ پیره‌که‌ی باردێ ، ئارذشا واتش تۆ پیه‌یوی ژیره‌نی و ئانا ئه‌سپ و ئانا زه‌ڕ لوه به دڵوو وێت گێڵه . شۆنیشه‌ره کابرای له‌م زلشا ئارذ واتش : ئانا قازانێوه حه‌لیم ئننه بوه‌ره تا ته‌قیه‌وه!!
جا نۆبه‌و جوانه‌که‌ی یاوا . شا عه‌باس واتش : ئه‌رێ براکه‌م ژه‌نیت هه‌نه ؟ ئاذیچ ماچۆ ئه‌رێ وه‌ڵڵا هه‌نه‌م . جا شا عه‌باس ده‌سوورش دا بلا دڤێ هێڵێ بارا، یۆشا ره‌نگ کریا بۆ و ئه‌ویچشا هه‌ر هێڵێوی ساذه بۆ . ئارذێشا و واتش دا ئا دڤه هێڵه‌یه ماڕه . کابرایچ هێڵه‌کێش ماڕه‌ی. واتش چێش بێ دلێشانه ؟ کابرایچ ماچۆ ده‌ی قۆربان هه‌ر ئانه که مشیۆم دلێ هێڵه‌ینه بۆ . واتش ده‌ی سا خاس بزانه ئا ره‌نگ کریا ژه‌نه‌کۆ منه‌نه که جلێ زه‌ریفێ و ره‌نگاوره‌نگێش که‌رذێنێنه و تڵاش که‌رذه‌ن وێشه‌ره و ئا هێڵه ساذه‌یچه ژه‌نه‌کۆ تۆنه ، که مذیه‌یشا پۆنه ئه‌جۆت هێڵه ره‌نگ کریاکه چێوێو ته‌را، به‌ڵام که ماڕیشا وینی هه‌رڤێ یه‌ک چێوا . تۆیچ بزانه ژه‌نه‌کۆ من و ژه‌نه‌کۆ تۆ هیچ فه‌رقێوشا نیا و ئانه که تۆ ئه‌جۆت ژه‌نه‌کۆ من زه‌ریف ته‌ره‌نه ، ته‌نیا وه‌روو ئانه‌یه‌نه که جلێ زه‌ریفێش ئینه‌ی پۆره . لوه قه‌ذروو ژه‌نه‌کێت بزانه و پێوه‌ره به شاذی بژیودێ.
******************************************************************************
سه‌رچه‌مه : سرزمین قصه‌ها ، اسماعیل زرعی
سلام علیکم. ده س تا وه ش بو کاک عبدۆڵڵا . داستانه ی فره وه شه بی